頭條日報頭條網 - 陳志健義氣仔女

■小時候的Otto，絕對是人見人愛車見車載的小朋友，「嗰時我眼仔碌碌都算幾精靈，所以好多長輩都好錫我㗎！仲因為咁有好多個契爺?！不過我亦都好頑皮，所以你見我冇咗隻門牙，就係跳嚟跳去撞甩咗囉！」

潛質初現　　正所謂三歲定八十，自小已很好動愛表演的Otto，幼稚園畢業要同同學仔一齊耍功夫，他都特別認真過人，「細個屋企住喺香港仔啲唐樓，所以成日上天台玩，呢次知道要表演，我好緊張，仲要媽咪同我上天台排練呀！」

失散兄弟　　早前拍攝《張保仔》，亦令Otto搵到「失散兄弟」，「我同（陳）展鵬最多對手戲，其次就係（陳）山聰，我哋喺橫店拍外景時，仲組成『陳氏宗親會』，佢哋兩個都好幫我，大家拍嘢有商有量，唔會自私搶戲㗎！」

改變一生　　Otto未參加06年「香港先生選舉」前，已在互動電視主持清談節目兼做模特兒，「諗住想有個大啲平台咪試吓參加，點知仲攞埋『健力組』冠軍，呢次比賽真係改變咗我一生，令我有機會搵到最鍾意嘅演員工作。」

好友助興　　不愛應酬的Otto，難得跟陳敏之、森美和鄭世豪拍《法網追擊》成好友，這次他們還一齊撐世豪參加《星夢傳奇》，「同佢哋真係好夾，佢哋亦好幫我，好似我結婚時，森美專登喺《早霸王》聽我電話，畀我公開講愛的宣言，搞到我太太幾感動呀！」

至fit body 　　Otto憑住fit爆身形，已做了多年纖體公司代言人，「呢次係13年影宣傳照時，嗰時真係最fit，得番140磅度，條腰得27吋，不過影前一日最辛苦，除咗照樣要狂操之外，仲要連水都唔敢飲，希望啲線條收得靚啲。」

守望相助　　小時候Otto的父母在街邊擺檔賣雲吞麵，經常食雲吞的他，亦有當上童子軍，「張相係小學時，印象唔深，反而中學有次童軍宿營，我踢跌個熱水煲淥親隻右腳，去完急症室返嚟，隊友專登留番啲嘢食畀我，又幫我攞嘢，真係好感動㗎！真係體現咗守望相助精神。」

一世老友　　讀聖伯多祿小學的時代，是Otto（黑衫者）最開心的，「呢次係我哋去畢業宿營，坐中間嗰個係教數學同體育嘅黎Sir，我哋成班同黎Sir都Keep住有聯絡㗎！因為我小學開始搬咗去利東邨住，呢班同學仲係鄰居嚟，由細打籃球打到大，感情好深厚㗎！」

多得照應　　高中讀聖伯多祿中學時的Otto（左），性格反而變得內向，但一樣交到知心好友，「中四、五時，父母嘅麵檔雖然入咗舖頭，但租金貴生意難做，搞到蝕本收場，我唔想加重佢哋負擔，每朝派完報紙先返學，好在有阿勁（中）同阿然兩個老友照應，我哋𠵱家都仲有聯絡㗎！」

險變怪物　　在瑪利亞書院重讀中五的Otto，同期亦迷上健身，跟同學阿堅齊齊狂操，「嗰時係人生最大隻嘅時候，有成200磅，身邊個個朋友都咁大隻，真係唔覺誇張，但搞到阿Sir出聲，話我再操就變怪物，我先識收斂番啲咋！」